INNER JOIN

JOIN ikki jadvalni kalitlari bo‘yicha birlashtiradi. Bu SQL’ning eng kuchli va eng ko‘p ishlatiladigan imkoniyatlaridan biri.

Qolip

SELECT …
FROM jadval_a
JOIN jadval_b ON jadval_a.kalit = jadval_b.kalit;

ON dan keyin — qaysi qatorlar bir-biriga mos kelishi sharti. Odatda bu «tashqi kalit = birlamchi kalit».

Birinchi JOIN

Guruh nomi yonida fakultet nomi:

SELECT study_groups.name, faculties.name
FROM study_groups
JOIN faculties ON study_groups.faculty_id = faculties.id;

Ikkala jadvalda ham name ustuni bor, shuning uchun qaysi jadvalniki ekanini yozish shart: study_groups.name.

Taxalluslar — qisqaroq yozish

SELECT g.name AS group_name, f.name AS faculty
FROM study_groups g
JOIN faculties f ON g.faculty_id = f.id
ORDER BY f.name, g.name;

study_groups g — jadvalga g deb qisqa nom berdik. Ko‘p jadvalli so‘rovlarda bu juda qulay.

JOIN + WHERE + GROUP BY

JOIN dan keyin hammasi odatdagidek ishlaydi: filtr, guruhlash, saralash.

SELECT f.name AS faculty, COUNT(*) AS teachers
FROM teachers t
JOIN faculties f ON f.id = t.faculty_id
GROUP BY f.name
ORDER BY teachers DESC;

ON ni unutsangiz nima bo‘ladi?

Shartsiz ulashda har bir qator ikkinchi jadvalning har bir qatori bilan juftlashadi. 32 ta guruh × 6 ta fakultet = 192 ta ma’nosiz qator. Bu dekart ko‘paytmasi deyiladi va katta jadvallarda bazani «osib» qo‘yishi mumkin. Natijada juda ko‘p qator chiqsa — birinchi navbatda ON ni tekshiring.

INNER JOIN aslida nima?

JOIN = INNER JOIN. U faqat ikkala jadvalda ham jufti bor qatorlarni qaytaradi. Masalan, kuratori yo‘q guruh teachers bilan ulanganda natijaga tushmaydi. Juftsiz qatorlar ham kerak bo‘lsa — LEFT JOIN (keyingi dars).

Esda qoldiring

• JOIN … ON a.fk = b.id — ikki jadvalni kalit bo‘yicha ulaydi.
• Bir xil nomli ustunlarda jadval nomini yoki taxallusni yozing.
• Juda ko‘p qator chiqsa — ON sharti yetishmayapti.